Dil O nigaah pe kis taur ke azaab utray
Wo maahtaab hi utra, na uske khaab utray
Wo maahtaab hi utra, na uske khaab utray
KahaaN woh rut K jabeenoN pe aaftaab utray
Zamana beet gaya unki aab O taab utray
Main usse khul ke miluN, soch ka hijaab utray
Woh chahta hai meri rooh ka naqaab utray
Udaas shab meN, kaRi dopaher ke lamhoN meN
Koi charaagh, koi suurat E gulaab utray
Kabhi kabhi tere lehje ki shabnami Thandak
Samaa’atoN ke darichon pe khaab khaab utray
Faseel E shehar E tamanna ki zard bailoN per
Tera jamaal kabhi surat E sahaab utray!
Teri haNsi meN naye mausamoN ki khushbu thi
Naveed ho K badan se puraane khaab utray
Supurdagi ka mujassam sawaal ban ke khiluN
Misaal E qatra E shabnam tera jawaab utray
Teri tarah, meri aankheN bhi mo’tabar na raheeN
Safar se qabl hi raston meN woh saraab utray!!
( Majmua-e-kalaam : Khushbu : se )
No comments:
Post a Comment