Nam Hain Palkein Teri Aye Mooj-e-Hawa,,Raat K Sath

Nam Hain Palkein Teri Aye Mooj-e-Hawa,,Raat K Sath

Kia Tujhe Bhi Koi Yaad Aata Hai Barsat K Sath...

Roothny Aur Manany Ki Haddein Milny Lagi

Chasam Pooshi K Saleeqy Thy,,Shikayat K Sath... 

Tujh Ko Kho Kr Bhi Rahoon,,Khalwat-e-Jaan Main Teri

Jeet Paye Hai Mohabbat Ne Ajab,,Maat K Sath...

Neend Lata Hua,,Phir Aankh Ko Dukh Deta Hua

Tajruby Dono Hai Wabsta Tere Haat K Sath...

Kabhi Tanhai Se Mehroom Na Rakha Mujh Ko

Dost Humdard Rahy Kitny,,Meri Zaat K Sath..

Terii Khushbu kaa pataa karti hai

Terii Khushbu kaa pataa karti hai
Mujh pe ehasaan hawaa karti hai

Shab ki tanhaai meN ab to aksar
Guftagu tujh se raha karti hai

Dil ko us raah pe chalanaa he nahiN
Jo mujhe tujh se judaa karti hai

Zindagi meri thi lekin ab to
Tere kahne meN raha karti hai

Us ne dekhaa hi nahiN warnaa ye aaNkh
Dil kaa Ahawaal kahaa karti hai

Be-niyaaz-e-kaaf-e-dariyaa angusht
Ret par naam likhaa karti hai

Shaam parte he kisi shaKhs ki yaad
Kuuchaa-e-jaaN meN sadaa karti hai

Mujh se bhi us ka hai waisa hi suluk
Haal jo teraa ana karti hai

Dukh huaa kartaa hai kuchh aur bayaaN
Baat kuchh aur huaa karti hai

Abr barse to inaayat us ki
ShaaKh to sirf duaa karti hai

Humne dekhi hai wo ujli saa’at
Raat jab she’r kaha karti hai

Mas’ala jab bhi chiraagooN ka uThe
Faisalaa sirf hawaa kerti hai

Khulegi uss nazar pe chashm-e-tar aahista-aahista

Khulegi uss nazar pe chashm-e-tar aahista-aahista

Kiya jaata hai paani mein safar aahista-aahista

Koi zanjeer phir waapas waheeN par le ke aati hai

Kathin ho raah to chhut’ta hai ghar aahista-aahista

Badal dena hai rasta ya kaheeN par baith jaana hai

K thakta jaa raha hai humsafar aahista-aahista

Khalish ke saath iss dil se na meri jaan nikal jaaye

Khinche teer-e-shanaasaai magar aahista-aahista

Hawa se sarkashi mein phool ka apna zayaaN dekha

So jhukta jaa raha hai ab ye sar aahista-aahista

Meri shola mijaazi ko wo jangal kaise raas aaye

Hawa bhi saans letii ho jidhar aahista-aahista.

Qaryaa-e-jaaN mein koi phool khilaane aaye

Qaryaa-e-jaaN mein koi phool khilaane aaye
Woh mere dil pe nayaa zakhm lagaane aaye

Mere veeraan darichoN mein bhi khushbu jaage
Woh mere ghar ke dar-o-baam sajaane aaye

Uss se ek baar to roothuN main usee ki maanind
Aur meri tarh’ se wo mujhko manaane aaye

Isee kuche mein kayi us ke shanaasa bhi to hain
Woh kisi aur se milne ke bahaane aaye

Ab na puchhungi main khoye hue khaboN ka pata
Woh agar aaye to kuch bhi na bataane aaye

Zabt ki shehar-panaahoN ki mere maalik khair
Gham ka sailaab agar mujhko bahaane aaye.

Shaayed uss ne mujhko tanha dekh liya hai

Shaayed uss ne mujhko tanha dekh liya hai
Dukh ne mere ghar ka rasta dekh liya hai

Apne aap se aankh churaaye phirti hoon main
Aayine mein kiska chehra dekh liya hai

Ab bhi sapne boye to eimaan hai uska
Usne in aankhon mein sehra dekh liya hai

Uss ne mujhe dar-asal  kabhi chaha hi nahi tha
Khud ko de ker yeh bhi dhoka dekh liya hai

Uss se milte waqt ka rona kuch fitri tha
Uss se bichar jaane ka nateeja dekh liya hai

Rukhsat karne ke aadaab nibhaane hi they
Band aankhon se usko jata dekh liya hai !!

Tera ghar aur mera jungal bheegta hai saath saath

Tera ghar aur mera jungal bheegta hai saath saath
Aisi barsaateN ke badal bheegta hai saath saath

Bachpane ka saath hai phir aik se dono ke dukh
Raat ka aur mera aanchal bheegta hai saath saath

Woh ajab duniya, k sab khanjar bakaf phirte hain, aur
Kaanch ke peyaloN maiN sandal bheegta hai saath saath

Baarish-e-sang-e-malamat maiN bhi woh hamraah hai
MaiN bhii bheeguN khud bhi pagal bheegta hai saath saath

LaRkiyoN ke dukh ajab hote haiN sukh us se ajeeb
Hans rahi haiN aur kaajal bheegta hai saath saath

Baarish huee to phuloN ke tan chaak ho gaye

Baarish huee to phuloN ke tan chaak ho gaye
Mausam ke haath  bheeg ke saffaak ho gaye

Baadal ko kya khabar hai k baarish ki chaah meN
Kitne buland-o-baala shajar khaak ho gaye

Jugnu ko din ke waqt parakhne ki zidd kareN
Bachche hamaare ‘ahd ke  chaalaak ho gaye

Lehra rahi hai barf ki chaadar hata ke ghaas
Sooraj ki shah pe tinke bhi bebaak ho gaye

Sooraj-dimaag log bhi iblaagh-e-fikr mein
Zulf-e-shab-e-firaaq ke pechaak ho gaye

Jab bhi ghareeb-e-shehar se kuch guftagu huee
Lehje hawa-e-shaam ke namnaak ho gaye

Saahil pe jitne aabguzeeda thhay sab ke sab
Dariya ke rukh badalte hi tairaak ho gaye

ChiraaGh maangte rahne ka kuch sabab bhi nahiN

ChiraaGh maangte rahne ka kuch sabab bhi nahiN
Andhera kaise batayeN k ab to shab bhi nahiN

Main apne zo’m mein ek bazyaft par khush huN
Ye waqia hai ke mujh ko mila wo ab bhi nahiN

Jo mere shai’r meN mujh se zayada boltaa hai
Main os ki bazm meN ek harf zer-e-lab bhi nahiN

Aur ab to zindagi karne ke sau tareeqe haiN
Hum us ke hijr meN tanha rahe thay tab bhi nahiN

Kamal shakhs tha jis ne mujhe tabaah kiya
Khilaaf us ke ye dil ho saka hai ab bhi nahiN

Ye dastakeN ye meri zindagi ki aadhi raat
Hawaa ka shor samajh luN to kuch ajab bhi nahiN

Ye dukh nahiN K andheroN se sulh ki hum ne
Malaal ye hai ke ab subH ki talab bhi nahiN

Hisaab-e-dar-badari tujh se maang saktaa hai
Ghareeb-e-shahr magar itna be adab bhi nahiN

HameN bahut hai ye saadaat-e-ishq ki nisbat
Ke ye qabeela koii aisa kam nasab bhi nahiN

Ek na ek roz to rukhsat karta

Ek na ek roz to rukhsat karta

Mujh se kitni bhi muhabbat karta

Sab ruteN aake chali jaati haiN

Mausam E Gham bhi to hijrat karta

BheRiye mujh ko kahaaN pasakte

Woh agar meri hifaazat karta

Aur us se na rahi koi talab

Bas mere pyaar ki izzat karta

Mere lehje meN Ghurur aayaa tha

Usko haq tha k shikaayat karta

Pura dukh aur aadha chaand

Pura dukh aur aadha chaand
Hijr ki shab aur aisa chaand

Din meN wahshat bahal gayi thi
Raat hui aur nikla chaand

Kis maqtal se guzra hoga
Itna sahmaa sahmaa chaand

YaadoN ki aabaad gali meN
Ghoom raha hai tanha chaand

Meri karwat per jaag uthey
NeeNd ka kitna kachcha chaand

Mere muNh ko kis hairat se
Dekh raha hai bhola chaand

Itnay ghanay baadal ke peechhe
Kitna tanha hoga chaand

AaNsu roke noor nahaaye
Dil dariya, tann sehra chaand

Itne roshan chehre per bhi
Suraj ka hai saya chaand

Jab paani meN chehra dekha
Tunay kisko socha chaand?

Bargad ki aik shaakh hata ker
Jaanay kisko jhaaNka chaand

Baadal ke resham jhoolay meN
Bhor samay tak soya chaand

Raat ke shaanoN per sar rakkhe
Dekh raha hai sapna chaand

Sookhay pattoN ke jhurmat per
Shabnam thi ya naNnha chaand

Haath hila ker rukhsat hoga
Uski surat hijr ka chaand

Sehra sehra bhatak raha hai
Apne ishq meN sacha chaand

Raat ke shayed aik bajey haiN
Sotaa hoga mera chaand !!

Taazaa muhabbatoN ka nasha jism-O-jaaN meN hai

Taazaa muhabbatoN ka nasha jism-O-jaaN meN hai
Phir mausam-E-bahaar mere gulsitaaN meN hai

Ik khaab hai ke baar-E-digar dekhte haiN hum
Ik aashna si roshni saare makaaN meN hai

Tabish meN apni mehr-O-mah-O-najam se siwa
Jugnoo se yeh zameen ko kaf-e-aasmaaN meN hai

Ik shaakh-E-yaasmeen thi kal tak khizaaN asar
Aur aaj sara baaGh ussi ki amaaN meN hai

Khushbu ko tark karke na laaye chaman meN rang
Itni to soojh boojh mere baaghbaaN meN hai

Lashkar ki aankh maal-E-ghaneemat pe hai lagi
Salaar-E-fauj aur kisi imtehaaN meN hai

Har jaan nisaar yaad dihaani meN munhamik
Naiki ka har hisaab dil-E-dostaaN meN hai

Hairat se dekhta hai samandar meri taraf
Kashti meN koi baat hai ya baadbaaN meN hai

Uska bhi dheyaan jashn ki shab ae sipah dost
Baqi abhi jo teer, uduu ki kamaaN meN hai

Baithe raheNge shaam talak tere sheesha gar
Yeh jaante huye ke khasaaraa dukaaN meN hai

Masnad ke itne paas na jaayeN ke phir khaley
Woh be-taaluqi jo mizaaj-E-shahaaN meN hai

Warna yeh taiz dhoop to chubhti humeN bhi hai
Hum chup khaRe huye haiN ke tu saayebaaN meN hai

Gulaab haath meN ho, aaNkh mein sitaaraa ho

Gulaab haath meN ho, aaNkh mein sitaaraa ho

Koi wujood mohabbat ka iste’aaraa ho

MaiN gahray paani ki is ro ke saath bahti rahuN

Jazeeraa ho ke muqaabil koi kinaaraa ho !

Kabhi kabhaar usay dekh leN, kahiN mil leN

Yeh kab kaha tha ke woh khushbadan hamaaraa ho

Qusoor ho to hamaare hisaab meN likh jaaye

MohabbatoN meN jo ehsaan ho, tumhaaraa ho

Yeh itni raat gaye kaun dastakaiN degaa

KahiN hawa ka hi uss ne na roop dhaaraa ho

Ufaq to kya hai dar-E-kehkashaaN bhi chhu aayeN

MusafiroN ko agar chaaNd ka ishaaraa ho

MaiN apne hissay ke sukh jiske naam kardaaluN

Koi to ho jo mujhe iss tarah ka pyaaraa ho

Agar wujood meN aahang hai to wasl bhi hai

MaiN chaahe nazm ka tukRa, woh nasr paaraa ho

Chaaraa – gar haar gaya ho jaise

Chaaraa – gar  haar  gaya ho jaise
Ab  to  marnaa hi dawaa ho jaise

Mujhse bichhRa tha vo pahle bhi magar
Ab ke  yeh dard naya ho jaise

Mere maathe pe tere pyar kaa haath
Rooh par dast E sabaa ho jaise

YuN bahut haNs k mila tha lekin
Dil hi dil me woh khafaa ho jaise

Sar chhupaayeN to badan khulta hai
Zeest  muflis  ki  ridaa ho jaise